Janë zbardhur detaje të reja nga ngjarja e rëndë e regjistruar këtë të shtunë në qytetin e Laçit, pranë ish-Gjykatës, ku mbetën të plagosur katër persona.
Nga informacionet paraprake mësohet se autorë ende të paidentifikuar, kanë qëlluar me armë zjarri automatike drejt një automjeti në lëvizje, me të cilin po udhëtonin tre të rinj.
Të tre ata kanë mbetur të plagosur, teksa plumbat kanë kapur dhe një shitëse ambulante, një grua e cila ndodhej në trotuar duke shitur qirinj, duke e lënë të plagosur.
Të plagosurit janë dërguar me urgjencë drejt spitalit të Traumës në Tiranë, teksa burime për mediat bëjnë me dije se njëri prej të rinjëve, është futur direkt në sallën e operacionit dhe ndodhet në gjendje kritike për jetën.
Ende nuk dihet nëse kemi të bëjmë me një atentat mafioz, apo me një konflikt të ditësh mes të rinjëvem, por kjo është e disata ngjarje që plumbat kapin qytetarët e pafajshëm.
