Gazetari Bledian Koka ka folur mbi problematikat që përfshijnë qeverisjen aktuale, me fokus të veçantë tek censura në mediat shqiptare e cila theksohet fort në përmbajtjen alarmante të rezolutës së fundit të miratuar në Parlamentin Europian.
Koka solli në vëmendje shkeljet e rënda të lirisë së medias, kapjen e institucioneve publike, përfshirjen e krimit të organizuar në proceset zgjedhore dhe përdorimin politik të administratës shtetërore.
Ai theksoi se kjo është hera e parë që një rezolutë e Bashkimit Europian flet me gjuhë të drejtpërdrejtë për këto probleme, duke i adresuar si kërcënime serioze për demokracinë dhe integrimin europian të vendit.“Pika më kryesore e kësaj rezolute, për mua si gazetar, ishte fakti që për herë të parë një rezolutë flet për censurën e tmerrshme që po ndodh në mediat shqiptare dhe jo në mediat private, por në ato që kanë licenca publike. Edhe mediat private, që funksionojnë me licencë publike, kanë detyrime ndaj publikut për një informim të paanshëm. Qëndrimet mund t’i diskutojmë, por ajo që është ngjarje dhe lajm nuk duhet të censurohet.
Jemi në pikën ku mediat me licencë publike censurojnë në funksion të 12 qeverive të BE-së. Këto media, më pas, mbajnë gjatë gjithë kohës premtimin e Ramës. Sot, qytetarët shqiptarë mësuan pas dy ditësh për miratimin e kësaj rezolute, nëse ndjekin vetëm këto media dhe jo Syri TV apo media të tjera të pavarura. Kjo, sepse sot këto media mundën ta përmendin ekzistencën e saj vetëm pasi reagoi Rama, ngaqë rezoluta përmban problematika të thella që lidhen me të.
Unë realisht besoj fort që kjo është një nga rezolutat më të ashpra dhe dramatike, sepse përtej tonit të ashpër është përmbajtja ajo që ka vlerë: ajo çfarë thuhet është vërtet kritike. Aty flitet me pika të qarta ndryshe nga progres-raportet e zakonshme me gjuhë të zbutur. Aty ka gjëra konkrete: thuhet që bandat janë angazhuar për llogari të qeverisë për të blerë zgjedhjet. Thuhet që qeveria po përdor administratën për të ndikuar në zgjedhje dhe po e shantazhon atë për të votuar për interesat e saj. Thuhet se mediat me licencë publike censurojnë aktivitetet e opozitës dhe promovojnë vetëm agjendën e qeverisë.
Pikat më kritike, përveç pastrimit të parave dhe përfshirjes së krimit jo vetëm në zgjedhje por edhe në ekonomi, përfshijnë edhe përshkrimin e një narkoshteti. Kulmi arrihet kur i thuhet Shqipërisë në fakt, Ramës, por në emër të vendit që nëse preken zgjedhjet, Shqipëria nuk ka vend në BE.
Pikërisht për këtë arsye, z. Berisha, duke u nisur nga kjo pikë e rezolutës, e pa të nevojshme që edhe një herë ta sillte para publikut përmes thirrjes së një konference të jashtëzakonshme, duke detyruar edhe ata që e kanë censuruar rezolutën ta publikojnë dhe ta komentojnë për publikun.”– tha Koka në emisionin ‘Task Force’.
