Gazetari Bledian Koka ka reaguar ashpër për situatën e përmbytjeve që ka goditur Durrësin dhe disa zona të tjera të vendit, duke e cilësuar krizën një pasojë të dështimit politik dhe jo të motit.
I ftuar në emisionin Task Force, Koka deklaroi se përmbytjet e ditëve të fundit “nuk janë rezultat i reshjeve intensive”, por i “dështimit të shtetit, paaftësisë së institucioneve dhe korrupsionit që ka shkatërruar infrastrukturën”.
Sipas tij, Durrësi është kthyer në një kënetë jo për shkak të shiut, por “sepse qeveria nuk ka funksionuar, nuk ka ndërhyrë dhe ka shkatërruar paratë publike”.
“Kjo nuk është një çështje e shirave, por e paaftësisë dhe mosveprimit të institucioneve. Katër ditë pas përmbytjeve, Komiteti i Emergjencave Civile akoma nuk është mbledhur, ndërsa qytetarët mbeten nën ujë.
Qeveria ka shpenzuar 100 miliardë euro në 11 vite, por kanalet kulluese mbeten të bllokuara dhe infrastruktura dështoi totalisht. Ndërkohë, 450 milionë euro të marra nga qytetarët për inceneratorët nuk janë përdorur dhe qyteti është lënë në kaos”, theksoi Koka.
