Janë zbardhur detaje të reja nga hetimet për atentatitn e regjistruar mbrëmjen e 17 Prillit në Tiranë, ku u qëllua me breshëri kallashnikovi në drejtim të një automjeti “Benz G-Class” dhe për pasojë mbetën të plagosur 4 persona, mes të cilëve dy fëmijë të mitur.
Burime për mediat bëjnë me dije se në vendin ku dyshohet se ishin fshehur autorët janë gjetur sende si: çanta, doreza dhe pinca. Ato dyshohet se janë përdorur për të prerë telin e rrethimit ku ishin fshehur me motor.
Nga këto sende mësohet se grupi hetimor ka përftuar ADN mikse pas analizave laboratorike dhe po bëhen krahasimet.
Gjithashtu, hetuesit janë fokusuar dhe te këqyrja e kamerave të sigurisë, jo vetëm ditën e ngjarjes, por edhe ditë para atentatit, pasi kanë dyshime dhe informacion se autorët kanë lëvizur me motor për disa ditë rreth vendit të ngjarjes por edhe në zonën e Lundrës, ku kanë studiuar terrenin.
Kujtojmë që mbrëmjen e 17 prillit u sulmuan me breshëri plumbash 11-vjeçari Dior Demiraj, 17-vjeçari Marko Demiraj, djemtë e pronarit të “Pelikan Security”, Vesel Bardhi Demiraj, 19-vjeçari Kian Mullaj dhe drejtuesi i automjetit “G-Class” Arenc Stafa, i cili është shofer i familjes Demiraj.
Tre të rinjtë janë shokë me njëri-tjetrin edhe komshinj prej kohësh pasi i kanë banesat ngjitur me njëri-tjetrin te “Rolling Hills”, ndërsa makina me targë AB002MD ishte në pronësi të Vesel Demiraj.
Deri më tani, ende nuk ka një pistë të saktë se kush mund të ketë qenë shënjestër e autorëve, si dhe ende nuk ka persona të dyshuar që mendohet të fshihen pas kësaj ngjarje të rëndë.
