Kukësi do të jetë pjesë e Kategorisë së Parë edhe për sezonin e ardhshëm. Verilindorët kanë fituar minimalisht 1-0 ndeshjen e “play out-it” ndaj Orikut, për të shmangur rënien në Kategorinë e Dytë.
Gjithçka është vendosur nga një penallti shumë e kontestuar, e akorduar në minutën e 30 të takimit nga gjyqtari Olsion Yzeiraj, pas një faulli në zonë ndaj Redon Danajt.
Ka qenë vetë ky i fundit që mori përsipër gjuajtjen duke e transformuar saktësisht për t’i dhënë avantazhin verilindorëve.
Oriku tentoi të reagonte, madje gjeti edhe golin e barazimit në minutën e 45-të, por u anulua për pozicion jashtë loje.
Skuadra e Orikut dështon të ngjitet në të Parën dhe do të mbetet të paktën edhe për një tjetër sezon në të Dytën.
Në krahun tjetër, Kukësi shpëton sezonin dhe shmang një tjetër zhgënjim, duke mbetur në Kategorinë e Parë.
