Kolegji i Posaçëm të Apelimit, KPA vendosi të enjten më 24 prill rikthimin në detyrë të prokurorit të Tiranës, Bajram Breçani, i cili ishte shkarkuar nga Komisioni i Pavarur i Kualifikimit rreth dy vjet e gjysmë më parë. Vendimi u mor me shumicë votash nga trupi gjykues i Kolegjit, i kryesuar nga Ina Rama, me relator Sokol Çomon dhe anëtare Mimoza Tasi, Natasha Mulaj dhe Rezarta Schuetz, pas shqyrtimit në dhomë këshillimi të ankimit të kryer porej Breçanit.
Prokurori Bajram Breçani u shkarkua nga KPK më 6 shtator 2022 për probleme në kriterin pasuror. Ndërkohë, ai u vlerësua pozitivisht për pastërtinë e figurës, si dhe nuk u konstatuan probleme penalizuese për profesionalizmin.
Shumica e trupës së Kolegjit, vendosi të enjten të ndryshojë vendimarrjen e Komisionit dhe e konfirmoi në detyrë Breçanin.
Bajram Breçani e ka filluar karrierën si prokuror në vitin 1995 dhe e ka ushtruar këtë detyrë deri në vitin 2000 pasi u shkarkua nga Prokurori i Përgjithshëm i atëhershëm. Ai fitoi me vendim gjyqësor të formës së prerë rikthimin në sistemin e drejtësisë dhe në vitin 2013 u caktua në Prokurorinë e Krujës. Një vit më vonë u transferua në Prokurorinë e Elbasanit ku shërbeu deri në vitin 2016, kur u caktua në Prokurorinë e Rrethit Gjyqësor Tiranë ku dhe e ushtron aktualisht funksionin.
