Derbi i fundi sezonal i “Madoninës” do të jetë takimi i fundit për Mehdi Taremin, i cili mbrëmjen e kaluar duket se kishte shansin e fundit për të treguar nëse vlen apo jo për standardet e Interit.
Sulmuesi zhvilloi një ndeshje nën nivel dhe për këtë motiv thuhet se klubi zikaltër e nxjerr në merkato. Tjetër histori thuhet për Kristjan Asllanin.
E ardhmja e shqiptarit është një rebus pasi raportimet nga Italia rrëfejnë histori të ndryshme.
“La Gazzetta dello Sport” ka bërë me dije se Asllani nuk konsiderohet më si një lojtar me potencial në klubin zikaltër dhe se gjatë verës do të jetë në merkato. Ndërsa sipas “SKY Italia” e ardhmja e shqiptarit nuk është vendosur ende.
Drejtuesit zikaltër mendojnë se Asllani mund të përmirësohet nëse ka në dispozicion minuta të konsiderueshme loje dhe për këtë arsye po konsiderojnë që ta huazojnë në një tjetër klub gjatë verës.
