Apeli i Posaçëm ka lënë në fuqi vendimin e GJKKO për Zambak Gjonin dhe Arnold Rrokaj. Të dy mbeten në qeli me masën arrest me burg.
Gjoni dhe Rrokaj u arrestuan për vjedhjen e të dhënave në e-mailet e prokuroreve të SPAK. Mes materialeve që kanë marrë duke ndërhyrë në mënyrë të paautorizuar e shpërndarë nëpër telefona, rezultojnë të dhëna nga SPAK për hetimet ndaj një ish zyrtari të larte, një biznesmeni etj.
“Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtari Dhimitër Lara, sot më 22.04.2025, shpalli vendimin mbi çështjen penale nr. 28 akti, datë 14.04.2025 regjistrimi, mbi ankimin e personave nën hetim Z.Gj., dhe A.Rr., me objekt: “Ankim ndaj vendimit nr. 32, datë 14.03.2025 të Gjykatës së Posaçme të Shkallës së Parë për Korrupsionin dhe Krimin e Organizuar”, disponuar në lëndë të masave të sigurimit personal, dhe vendosi:
Miratimin e Vendimit/Urdhrit nr. 32, datë 14.03.2025 të Gjykatësit që shqyrton kërkesat e palëve gjatë hetimeve paraprake në Gjykatën e Posaçme për Korrupsionin dhe Krimin e Organizuar”, njofton GJKKO.
