Seit Asllani dhe Naim Allmeta janë dy teknikët e imazherisë së spitalit të Bulqizës, punonjës prej 32 e 24 vitesh. Të dy punonjësit tregojnë se prej një viti merrnin një shtesë page prej 120 mijë lekësh të vjetra dhe në muajin Qershor vjen auditi nga Ministria e Shëndetësisë që konstaton, se janë paguar në shkelje.
Nga drejtoresha e spitalit u është thënë se do të duhet të kthejnë lekët dhe bëhet fjalë për 2 milionë lekë. Ata shprehen të shqetësuar, pasi detyrohen të mbulojnë 24 orë shërbimin e imazherisë, duke qenë se në zonë ndodhin edhe aksidente në miniera.
“Jemi dy teknikë imazherie të Spitalit të Bulqizës. Ngaqë punojmë në urgjencën e spitalit kemi marrë pagë shtesë dhe ishte një shtesë mbi pagën tonë. Aktualisht ishte 120 mijë lekë të vjetra. Tani me këtë kontrollin që erdhi është hequr dhe na është lënë t’i kthejmë lekët mbrapsht. Kontrolli ka ardhur me sa di unë nga Shtatori dhe ka lënë si projekt-raport që pagat tona të kthehen mbrapsht. Jemi njoftuar në datën 30 Dhjetor”, tha Seit Asllani.
“Jemi paguar me këtë shtesë mbi pagën me urdhër të drejtorisë të Spitalit Bulqizë. Duke qenë se turni i tretë rri bosh, thashë që të rri ta plotësoj me pagesë. Ishim vetëm dy punonjës dhe akoma jemi dy persona dhe mbulojmë turnin e parë dhe të dytë, komplet 24 orë. Sot jemi të detyruar që të kthejmë shumën prej rreth 2 milionë lekësh. Nuk e shikoj të arsyeshme që ne t’i kthejmë ato lekë”, tha Naim Allmeta.
Pas verifikimet të dokumentacionit për personelin mjekësor dhe jo mjekësor është konstatuar se nuk ka pasur grafikë shërbimi dhe nuk janë specifikuar turnet në listë prezencë. Në përfundim theksohet se janë paguar në shkelje dy teknikët e imazherisë, me shtesën për natyrën e veçantë të punës.
Drejtoresha e spitalit, Brunkita Rama thotë se dy imazheristët janë paguar me urdhër të drejtorit të mëparshëm. Auditi ka lënë detyrë, që të analizohet efekti financiar që ka shkaktuar kjo pagesë. Drejtoresha Brunkita Rama thotë se dy punonjësit mbulojnë shërbimin e urgjencës, por nuk përfshihen në strukturën e urgjencës.
“Drejtori ka nxjerrë një urdhër të brendshëm që teknikat e imazherisë duke qenë se punojnë në urgjencë, t’u paguhet gadishmëria. Ajo është një 12 mijë Lekë shtesë. Ne kemi bërë dhe një kërkesë se duke qenë se ata pjesën më të madhe të punës e bëjnë në urgjencë duhet që të përfshihen në strukturën e urgjencës. Realisht nuk janë në strukturën e urgjencës dhe personi që është në strukturën e urgjencës ka më shumë vështirësi pune dhe merr një shtesë që është 12 mijë lekë shtesë. Imazheria dhe laboratori nuk janë strukturat e urgjencës. Është projekt-raport, por jo raporti përfundimtar. Kjo shtesë duhet të ishte ndërprerë më parë, por kur doli VKM-ja e re ishte përcaktuar shumë qartë se si duhet të pagueshishn dhe nuk mund të ecim me një rregull të brendshëm, kur në fakt ëshët vendimi i Këshillit të Ministrave”, tha drejtoresha.
