7 turistë spanjollë, të cilët kishin mbetur të bllokuar në kanionin e Nivicës, janë shpëtuar nga autoritet tona. Turistët, që po eksploronin zonën e “Ujëvarës së Peshturës”, u bllokuan gjatë një ekspedite me litar për shkak të terrenit të vështirë.
Pas një operacioni shpëtimi të organizuar, ata u nxorën nga zona e rrezikshme dhe u transportuan në fshatin Dukaj, ku u akomoduan në gjendje të mirë shëndetësore.
“Më datë 16.04.2025, në vendin e quajtur “Ujëvara e Peshturës”, 7 turistë spanjollë që po eksploronin zonën, duke zbritur me litar në thellësinë e kanionit të Nivicës, kanë mbetur të bllokuar në kanion, për shkak të terrenit shumë të vështirë.
Menjëherë pas marrjes së njoftimit, shërbimet e Komisariatit të Policisë Tepelenë dhe shërbimet zjarrfikëse, janë nisur në drejtim të zonës ku kishin mbetur të bllokuar turistët. Fillimisht, ata kanë kontrolluar zonën me dron dhe kanë bërë të mundur lokalizimin e turistëve, në kanionin e Nivicës.
Pas disa orësh operacion kërkim-shpëtimi, në një terren shumë të vështirë dhe të rrezikshëm, shërbimet e Policisë, si rezultat i punës së mirorganizuar dhe i bashkëpunimit me shërbimet zjarrëfikëse, kanë bërë të mundur nxjerrjen e 7 turistëve spanjollë, nga terreni i vështirë ku kishin mbetur të bllokuar.
Turistët janë transportuar nga shërbimet e Policisë dhe janë akomoduar në një bujtinë, në fshatin Dukaj, në gjendje të mirë shëndetësore. Ata kanë falënderuar shërbimet e Policisë dhe shërbimet e tjera, për përkushtimin dhe humanizmin e treguar, si dhe për ndihmën e dhënë në kohë rekord“, thuhet në njoftimin e policisë.
