Policia e Tiranës ka arrestuar një 23-vjeçar, i cili akuzohet për 7 vjedhje të kryera brenda 48 orëve.
Sipas njoftimit zyrtar, i riu O.T. u identifikua dhe u vu në pranga pasi dyshohet se më 8 prill ka kryer tre vjedhje me thyerje në markete dhe dyqane të ndryshme në kryeqytet. Një ditë më pas, më 9 prill, ai ka vjedhur pesë biçikleta në rrugë dhe në ambiente banimi, pronë e katër qytetarëve.
“Shërbimet e Komisariatit të Policisë Nr. 2, në vijim të punës për goditjen e veprimtarisë kriminale të vjedhjes së pronës dhe pasurisë, bazuar dhe në kallëzimet e disa qytetarëve, për vjedhje në pronat e tyre, gjatë ditëve të fundit, kanë organizuar punën për zbardhjen e tyre, identifikimin dhe kapjen e autorit/ëve.
Si rezultat i një pune profesionale hetimore të kryer bazuar në inteligjencën policore, u finalizua operacioni policor i koduar “Repeater”, si rezultat i të cilit u arrestua shtetasi O. T., 23 vjeç.
Nga veprimet hetimore dyshohet se ky shtetas, më datë 08.04.2025, ka vjedhur me thyerje, në 3 markete/dyqane, dhe më datë 09.04.2025, ka vjedhur në banesa ose në rrugë, 5 biçikleta, në pronësi të 4 shtetasve.
Vijojnë hetimet për zbardhjen e vjedhjeve të tjera që mund të jenë kryer nga ky shtetas.“- njofton policia.
Materialet procedurale iu referuan Prokurorisë së Tiranës, për veprime të mëtejshme.
