Një urban i linjës së Unazës në Tiranë është përfshirë nga flakët.
Ngjarja ka ndodhur pranë Ministrisë së Jashtme, ndërsa dyshohet se shkak është bërë një defekt në motor.
Në momentin kur autobusi është përfshirë nga flakët ka qenë i mbushur me pasagjerë të cilët në panik kanë dalë me shpejtësi. Për fat të mirë nuk raportohet për persona të lënduar.
“Rreth orës 11:45, në bulevardin “Zhan D’ark”, dyshohet se si pasojë e një defekti teknik, ka marrë flakë në lëvizje, një autobus i linjës së unazës së re. Si pasojë ka vetëm dëme materiale. Shërbimet zjarrfikëse po punojnë për fikjen e zjarrit, ndërkohë grupi hetimor po punon për sqarimin e rrethanave të rastit”, njofton policia.
Materialet procedurale iu referuan Prokurorisë së Tiranës, për veprime të mëtejshme.
Urbanet në Tiranë janë kthyer në makth për qytetarët pasi shpesh herë përfshihen në aksidente tëndryshme në kryeqytet.
Kujtojmë se më 22 prill 2022, një autobus i shoqërisë “Green Line” me pronar Nadir Çausholli doli nga rruga dhe përfundoi në skarpatet e lumit Lanë, së bashku me pasagjerët, në zonën e quajtur “Pallatet Agimi”, shumë pranë ish-Bllokut.
Po ashtu një aksident masiv është shënuar në shkurt të viti 2023 ku u përfshi një autobus i Çaushollit dhe 11 makina, me të paktën 9 të plagosur.
