Mbledhja e sotme e Këshillit Bashkiak të Shkodrës ka dështuar për shkak të mos plotësimit të kuorumit të duhurit dhe një pjesë e mirë e pikave të rendit të ditës nuk janë miratuar.
Kuorumi nuk është plotësuar për shkak se mbledhja është braktisur nga këshilltarët e Partisë Social-Demokrate të Tom Doshit dhe dhe Partisë Demokratike.
Pasi u miratuan vetëm pikat e para të rendit të ditës që lidhen me shtresat sociale, anëtarja e këshillit Marin Duhani e PSD bëri me dije se social-demokratët nuk do të vijonin më mbledhje. Social-demokratët pretendonin se pikat e tjera po bëheshin për fushatë.
Pas kësaj levizje të këshilltarëve të Tom Doshit, grupi i këshilltarëve të PD-së ka kërkuar 5 minuta pushim për tu rikthyer në sallë dhe njoftimin e vendimit për bojkotimin e mbledhjes së këshillit edhe nga ana e tyre.
Një ndër pikat e dërguara sot për miratim në mbledhjen e Këshillit Bashkiak ishte dhënia e një sipërfaqe të madhe të rërës në plazhin e Velipojës në administrim të ndërmarrjes Bio Strajca sh.a, me qëllim që shezllonet në këtë sezon veror t’i vendosë kjo shoqëri aksionere e administruar nga bashkia dhe jo më privatët apo operatorë turistik siç ka qenë më përpara.
Në total në rendin e ditës ishin 18 pika, teksa u miratuan vetëm të parat si fondi 6% për shkurtin dhe marsin, qiraja e banesave sociale, strehim emergjent i një familje dhe një ndihmë financiare për dëmet e shkaktuara nga zjarri në një familje.
Braktisje e mbledhjes së Këshillit Bashkiak nga PSD, vjen edhe pas disa shkarkimeve të drejtorëve rajonal të PSD-së në qarkun Shkodër, përpara zgjedhjeve parlamentare të 11 majit.
