Gazetari Sokol Bregu duke folur në MCN tha se hakerimi i email-eve dhe materialeve nga tre prokurorë të SPAK-ut është një skandal shumë i madh, për të cilin duhet edhe një hetim administrativ.
Sipas Bregut kjo është një goditje publike për SPAK-un, lidhur me mosbesimin se çfarë ndodh në këtë ndërtesë. Ai shton se s’janë vetëm gazetarët që kanë marrë informacion, por edhe persona me pushtet shtetëror, dhe do të duhej një shpjegim më i detajur nga SPAK-u.
“Të vjedhësh informacionet e SPAK ka dy arsye: Ose ti je objekt hetimi të intereson të dish dhe të shkatërrosh prova, ose i ke për të shitur. Asnjë nga këto të dyja s’është. Dy të arrestuarit s’janë objekt hetimi dhe s’rezulton që kanë shitur informacion. Pse ka ndodhur, është një dilemë e madhe.
Është një skandal shumë i madh, duhet të kishte edhe një hetim administrativ brenda. A u treguan të pavëmendshëm prokurorët? Mbase e kanë përdorur email-in në një server të pakontrolluar jashtë godinës së SPAK. Si arritën të futen? Si u mor informacioni? Kuptohet që më pas Shqipëria është një vend ku ka konspiracion pa fund, ku konspiracionin më të bukur e bën lideri opozitës Berisha.
Si ka mundësi u futën te këto 3 kompjuter dhe vetëm te kompjuteri i Dumanit s’u futën dot. Njerëzit që janë në dijeni të informacioneve që ju dërgua janë me pushtet shtetëror. Këta s’u ndaluan nga SPAK, vetëm iu komunikua fjalia që nëse i përdorni ose shpërndani do arrestoheni. Mendoj që kjo është goditja e parë që SPAK merr, një goditje publike e mosbesimit se çfarë ndodh në këtë ndërtesë.
Tani nuk na qenkan vetëm gazetarët që kanë marrë informacion. Unë prisja që SPAK të jepte një shpjegim më i detajuar se çfarë ka ndodhur. SPAK na thotë që ka një hetim për grup të strukturuar kriminal, por ka arrestuar vetëm dy veta, për një grup të strukturuar kriminal duhen të paktën 3 veta” – tha Sokol Bregu.
