Policia e Fierit ka zbardhur ngjarjen e regjistruar pasditen e të dielës, ku u dogj totalisht një lokal në bregdetin e Darzezës, duke shkaktuar dëme të konsiderueshme materiale.
Si autor të dyshuar të zjarr vënies, uniformat blu kanë ndaluar 5 të rinj dhe kanë shpallur në kërkim një tjetër. Më konkretisht, janë ndaluar shtetasit A. T., 23 vjeç, E. M., 20 vjeç, A. S., 20 vjeç, E. L., 19 vjeç dhe D. L., 19 vjeç, të pestë banues në Fier, si dhe është shpallur në kërkim shtetasi A. R., 19 vjeç.
Policia thotë se vijon puna për kapjen e shtetasit A. R., si dhe në drejtimin e Prokurorisë, po kryhen hetime për të individualizuar përgjegjësinë penale të secilit prej këtyre shtetasve, si dhe për të dokumentuar shkakun e zjarrit.
Materialet procedurale i janë referuar Prokurorisë së Fierit, për veprën penale “Shkatërrimi i pronës me zjarr”, kryer në bashkëpunim.
