Diego Simeone ende nuk e ka pranuar eliminimin e Atletico Madridit nga Liga e Kampionëve.
Pavarësisht hidhërimit për barazimin në La Liga (1-1 ndaj Espanyolit), që e ka larguar thuajse përfundimisht ekipin e tij nga titulli, trajneri argjentinas është rikthyer te dy ndeshjet kundër Real Madridit dhe ka bërë një referencë të qartë për penalltinë e Julian Alvarez, e cila u anullua pas sinjalizimit të VAR-it nga gjyqtari Marciniak.
“Le të ngrejë dorën kush e pa”, – kishte thënë ai menjëherë pas fërshëllimës së fundit në “Metropolitano”. Mbi dy javë pas atij momenti shumë të debatuar dhe kontestuar, 54-vjeçari është ende i zemëruar:
“Në Ligën e Kampionëve, këtë vit, bëmë mirë dhe mundëm Real Madridin. Eliminimin tonë e vendosi UEFA, fituam ndaj Real Madridit në kthim, por e pamë të gjithë çfarë ndodhi. U eliminuam për një vendim të gjyqtarit dhe të UEFA-s, për një prekje të dyshimtë nga Julian”.
Ky është mesazhi i tij i qartë, i përsëritur disa herë në intervistat që pasuan atë mbrëmje të hidhur.
