Stefano Pioli pritet të bëhet shumë shpejt trajneri i katërt që largohet nga drejtimi i klubit të Al Nasr që kur Cristiano Ronaldo iu bashkua skuadrës saudite dhe vetë portugezi është përsëri shkaku.
Mediat italiane bëjnë të ditur se marrëdhënia e teknikut italian me portugezin thuajse nuk ekziston më, si pasojë e rezultateve që nuk vijnë apo edhe lojës.
Seria prej 2 fitoresh në 5 ndeshjet e fundit në kampionat, ka lënë Al Nasr larg kreut dhe largimi i Piolit duket i pashmangshëm ndonëse ish-trajneri i Milanit ishte afruar me shumë bujë nga sauditët.
Pioli në fakt nuk mund të vazhdojë për shkak të situatave të krijuara në klub, ku çdo gjë është nën ndikimin e Ronaldos.
Situata u përkeqësua dy javë më parë, kur Pioli vendosi të zëvendësonte Ronaldon, i cili nuk ngurroi të përplasej verbalisht me trajnerin para se të ikte direkt në dhomat e zhveshjeve.
“SportItalia” raporton se kjo marrëdhënie inekzistente tashmë me lojtarin po e shtyn drejt largimit dhe kthimit në Itali, ku e pret krahëhapur Roma, por edhe Juventusi është mes atyre që interesohen për teknikun.
