Tirana e këtij sezoni është një dështim spektakolar. Edhe nëse arrin të marrë 18 pikët e mbetura në kampionat, ajo sërish nuk prek nivelin e sezonit të shkuar.
Skuadra vjet grumbulloi 50 pikë në 36 javë dhe u rendit e pesta, por shkoi në Europë, pasi Skënderbeu nuk kishte licencë për të luajtur në kompeticionet ndërkombëtare. Këtë sezon, në rastin më të mirë, bardheblutë mbledhin 49 pikë.
Me një krahasim të vogël, ekipi bën më keq se një kampionat më parë, ndërsa në javën e 30-të të sezonit të shkuar, Tirana kishte 40 pikë. Këtë vit, bardheblutë kanë 31 pikë. Pra, nëntë pikë më pak se vjet.
Një gjendje delikate te klubi bardheblu dhe të thuash se objektivi i skuadrës ishte sigurimi i “Final 4” diçka e shprehur nga presidenti Refik Halili me kthimin e Shkëmbit në pankinë.
Shpëtim i sezonit të dështuar në këto kushte do të ishte mbijetesa në elitë, ndërsa Tirana ndeshjen e ardhshme do ta luajë ndaj Bylisit.
Pavarësisht formës jo të mirë të ekipeve edhe kjo ndeshje e ka një “favorit”. Sipas statistikave të ndeshjeve të shkuara, Tirana është favorit për ta fituar këtë ndeshje, pasi gjithnjë ka qenë “makth” për ballshiotët.
Në 34 ndeshje të zhvilluara mes njëra-tjetrës, bardheblutë kanë fituar 18 prej tyre, Bylisi ka triumfuar vetëm 6 herë, ndërsa 10 ndeshje të tjera kanë përfunduar në barazim.
