“Faleminderit, futboll!”. Me këtë mesazh në rrjetet sociale, Antonio Candreva ka vendosur të njoftojë largimin e tij nga futbolli i luajtur dhe tërheqjen nga karriera në moshën 38-vjeçare.
Pas disa muajsh si lojtar i lirë, ai ka vendosur të mos vazhdojë më pritjen dhe të varë këpucët në gozhdë.
“I dashur futboll, sot është një nga ditët më të rëndësishme të jetës sime: ka ardhur momenti të të përshëndes. Këtu, në ‘San Siro’, në tempullin e futbollit, ku luajta ndeshjen time të fundit. Tridhjetë vite më parë nisi udhëtimi im me ty, mes gëzimeve dhe dhimbjeve, sakrificave dhe fitoreve, por, mbi të gjitha, me shumë emocione. Kam jetuar ëndrrën dhe pasionin tim. Nuk e konsideroj një lamtumirë, por një pikë të re nisjeje. Faleminderit, futboll, shihemi së shpejti!” – shprehet Candreva në videon e publikuar në Instagram.
Karriera e Candrevas
Ai e nisi karrierën si profesionist me Ternana-n në vitin 2004, për të kaluar më pas tek Udinese, ku u huazua në disa klube (Livorno, Juventus, Parma, Cesena) para se të konsolidohej si lojtar.
Në 2012, u transferua te Lacio, ku fitoi Kupën e Italisë. Më pas, në 2016, kaloi tek Interi, duke grumbulluar mbi 150 paraqitje në katër sezone.
Candreva veshi fanellën e Salernitanës deri në vitin 2024. Me Kombëtaren Italiane luajti 54 ndeshje, shënoi 7 gola dhe mori pjesë në Botërorin 2014 dhe Europianin 2016.
