Pas dy mungesave radhazi mes tetorit dhe nëntorit të kaluar, Kylian Mbappé rikthehet të veshë fanellën e Kombëtares franceze.
Sulmuesi i Real Madridit, në lidhje me këtë rikthim, ka dhënë një intervistë për ‘Le Parisien’, ku ka trajtuar disa nga temat më të diskutuara aktualisht, si çështja e shiritit të kapitenit dhe pasuesi i mundshëm i trajnerit Didier Deschamps.
“A më ka munguar Franca? Po, dhe është kënaqësi të kthehem. Të gjithë e dinë çfarë do të thotë për mua kjo skuadër. Jam i lumtur që jam sërish këtu, kam të njëjtën energji dhe të njëjtën dëshirë për ta ndihmuar kombëtaren franceze të fitojë”, u shpreh Mbappé.
A ka një krisje mes tij dhe Deschamps?
“Jo! Nëse do të kishte një prishje marrëdhëniesh, nuk do t’i isha përgjigjur thirrjeve të tij. Të gjithë më njohin. Nëse prishet diçka me dikë, nuk mbaj kontakte, nuk mund të shtirem. Kjo nuk do të thotë se nuk mund të kemi ndonjëherë mendime të ndryshme. Edhe nëse nuk dua, mund të ndodhë. Por unë kam marrë një edukatë, gjithmonë kam pasur respekt dhe mirënjohje për trajnerin. Ai ka qenë trajneri im i vetëm në kombëtaren franceze dhe ishte ai që më dha thirrjen e parë. Kemi pasur sukses bashkë dhe marrëdhënia jonë nuk mund të hidhet në plehra për dy ose tri mosmarrëveshje që, në fund të fundit, nuk janë as të mëdha”, theksoi ai.
Dyshimet për përkushtimin e tij ndaj Francës
“Nuk kam ndier që njerëzit kanë dyshuar për lidhjen time me kombëtaren franceze. U bë lajm, është e vërtetë, por gjithçka kthehet në lajm”.
Sa i përket zhurmës mediatike rreth mungesës së tij, Mbappé shtoi:
“Këto gjëra ndodhin kur je ai që je dhe përfaqëson atë që përfaqëson. Mendoj se njerëzit, ngaqë nuk e kuptonin situatën, donin të mbushnin boshllëkun. Shkruan gjëra të pavërteta, bënë hamendësime, folën në emrin tim, duke thënë se përqendrohem vetëm te ndeshjet e mëdha të kombëtares dhe nuk doja të kthehesha… Ndonjëherë duhet ta lësh pas. Është aq qesharake sa nuk ia vlen as të përmendet”.
Mbi mundësinë që Zidane të zëvendësojë Deschamps
“Nuk e di kush do ta pasojë atë. E di për kë doni të flas, por nuk do ta bëj, sepse nuk është roli im. Ka një president të Federatës dhe ai do ta marrë këtë vendim. Të gjithë flasin për Zidane, kështu që mos bëjmë sikur jetojmë në një shpellë dhe nuk dimë çfarë po ndodh, por nuk më takon mua të flas për këtë”, përfundoi ai.
