Një foto e Bjeshkëve të Kosovës, e publikuar nga Ambasada gjermane në këtë vend, ka nxitur përplasje në rrjet, mes kësaj të fundit dhe përdoruesve serbë të rrjeteve sociale.
“Shëtitjet në terren në këtë vend të mrekullueshëm janë vërtet mbresëlënëse me një panoramë kaq mahnitëse. Përshëndetje nga maja më e lartë e Kosovës, Gjeravica dhe fqinjët e saj mahnitës”, ishte shkrimi që shoqëronte foton e postuar nga Ambasada në faqen e saj zyrtare në Facebook. Por postimi u pasua nga një sërë komentesh negative nga qytetarë serbë, të tillë si “Le ta dinë të gjithë se Kosova është serbi”, “këto janë male serbe”, apo “I dua bjeshkët e Serbisë’.
Ambasada gjermane nuk ka hezituar tu kthejë përgjigje të gjithë atyre, duke ia bërë të qartë realitetin e Kosovës. E disa nga përgjigjet e ambasadës ishin se “Serbia është Serbi dhe Kosova është Kosovë”, “Bjeshkët në këtë fotografi nuk i takojnë Serbisë”, “Serbia është e bukur, dhe pajtohemi. Por ky postim është për bukuritë e bjeshkëve të Kosovës”. Si rezultat i shumë komenteve të tilla, Ambasada gjermane u detyra të mbyllte komentet në postimin e saj./ A2CNN
