Qëndrimi me orë të zgjatura në telefon, pa bërë asgjë të rëndësishme, duket se është kthyer në një rutinë për të gjitha grup-moshat, ekspertët e quajnë këtë varësi ndaj telefonit, nomofobi. Ata thonë se shqetësues është hasja e kësaj varësie tek fëmijët.
“Me shqetësim vëmë re që një dukuri e tillë po haset tek adoleshentët, por dhe tek moshat më të vogla, te fëmijët”,-tha Jonida Haxhiaj, psikologe.
Rrjetet sociale me larmishmërinë e materialve që publikojnë, duket se janë kurthi në të cilin sipas ekspertes shpesh biem të gjithë.
“ Shumë prej nesh në momente të caktuar e gjejmë vetën duke scroll në contentet që për secilin prej nesh , në internet në mediat sociale ka content që është tërheqës, duke filluar që tek foshnjat e deri tek të moshuarit”,-tha psikologia Haxhiaj.
Mungesa e telefonit tek një person që ka varësi përkthehet në ankth të shtuar.
“Në momentin që mendon se ka harruar telefonin në shtëpi apo kudo, do shqetësohet shumë, dhe nëse është e pamundur që të kthehet ta marr do mendoj si e ka harruar , dhe pak të ngjarë ka të funksionojë normalisht me këtë harresë që ka ndodhur”, shtoi Haxhiaj.
Psikologia thotë se në momentin që ne e kemi të vështirë të qëndrojmë pa telefon, atëherë duhet kuptuar që kemi varësi dhe kemi nevojë të shkëputemi prej saj.
