Një denoncim ka mbërritur në redaksinë e emisionit “Stop” nga një stomatologe për konkurencë të pandershme nga dentistë që punojnë pa licencë.
Ajo thotë se stomatologët turq Melik Balikçi, Ziko Balikci dhe Ibrahim Balikci kanë klinika dentare në Tiranë dhe Vlorë, por nuk kanë licencë nga Urdhri i Stomatologut në Shqipëri.
“Stop” udhëton drejt Vlorës dhe realizon një konsultë me Melik Balikci në klinikën e babait të tij, Ziko Balikci.
Qytetari: Dua të bëj një konsultë që të flas.
Melik Balikci: Po! Çfarë problemi ke?
Qytetari: Kam dhëmbët!
Melik Balikci: Po!
Qytetari: Edhe kam këtë dhëmballën, e kam të mbushur e më bezdis!
Melik Balikci: Hajde këtej! Hajde ta shikojmë! Mbështetu!
Qytetari: E kam keq?
Melik Balikci: Po, po! Duhen hequr njëherë, duhen pastruar këto! Këto gurëzat.
Qytetari: Sa lekë vete heqja e gurëzave?
Melik Balikci: 40!
Qytetari: 40 mijë lekë?
Melik Balikci: 40 mijë lekë. Pra do bësh një pastrim gurëzash. Ta bëjmë njëherë pjesën e gurëzave. Të pastrojmë njëherë dhëmbët, çfarë ke, çfarë s’ke, pastaj në fund do të shikosh vetë çfarë problemi ke, çfarë shqetësimi të jep se tani janë gurëzat ato që mbajnë vendet atje.
Qytetari: Ti je ky doktor Ziko?
Melik Balikci: Jo, jam djali i tij.
Qytetari: Si e ke emrin ti?
Melik Balikci: Melik!
Edhe në zemër të Tiranës, në Blanco Dental “Stop” kryen një konsultë me Ibrahim Balikci. Ata bëjnë grafi, pastrim dhëmbësh, implante dhe ndërhyrje kirurgjikale. Në QKB është hapur një klinikë dentare në emër të Zekerye Balikci që ka të njejtën adresë të klinikave në Tiranë dhe Vlorë.
Qytetarja: Doktor Ibrahimi?
Ibrahim Balikci: Unë jam!
Qytetarja: Dua të bëj një konsultë për të parë se dua të bëj implantet!
Ibrahim Balikci: Ok! Sa të ndizet grafia dy sekonda, pritmë këtu 2 minuta!
Qytetarja: Unë kam edhe një… kam një eksperiencë të keqe nga një dentist tjetër. Para se të futesha te grafia, një konsultë me sy të lirë.
Ibrahim Balikci: Për implante nuk të jap dot konsultë me sy të lirë. Hajde avash-avash! Ok! Mbaruam! Do të bëj një në format letre. Pastaj një preventiv të mirë. Do ta bëj unë pak më vonë. Ky është me… ky është zirkon, ky është full zirkon. Implanti është gjerman, ajo ka 30 vite garanci, por kushton çikë më shumë, është 550 mijë lekë.
Qytetarja: Sa kohë keni ju që punoni…
Ibrahim Balikci: Këtu?
Qytetarja: Këtu, në profesion të paktën.
Ibrahim Balikci: Unë minimum 8 vite i kam. Babai im, ka shumë më shumë se unë. Ai është kirurgu.
Qytetarja: Po pra se mua më thanë doktor Ibrahimi më thanë, që është turk më thanë.
Ibrahim Balikci: Po, jam unë.
Ndërkohë në listën e licencave të stomatologëve nuk rezulton asnjë nga emrat e mjekëve turq. Nga Urdhri i Stomatologut thanë se ata nuk kanë licencë.
