Vajza që shihni në foton e mësipërmes është 24 vjeçares palestineze, Rayyan Alwan, e cila paraditen e djeshme u gjet e vrarë me thikë brenda një apartamenti të marrë me qira në rrugën “Gjon Muzaka”, pranë Bllokut të Ambasadave në Tiranë.
Si autor i vrasjes është shpallur në kërkim bashkëshorti i saj palestinez, Fadi Alwan, 49-vjeç. Vrasja dyshohet se është kryer që më 22 shkurt, 5 ditë para se të gjendej trupi i pajetë dhe 3 ditë pasi çifti kishte ardhur në Tiranë.
Rrethanat mbeten ende mister, por dyshohet partneri palestinez 49-vjecar erdhi në Shqipëri vetëm për të vrarë gruan, e për të ikur me avion pa frikën se do zbulohej, pasi zhduku çdo mjet identifikimi të 25-vjeçares dhe nuk e dha emrin as kur rezervoi apartamentin me qira ditor. Dyshohet se krimi ka qenë i mirëmenduar.
Burime bëjnë me dije se më 22 Shkurt, pasi ka vrarë bashkëshorten, Fadi Alwan, krejt i qetë ka marrë një taksi, ku ka udhëtuar drejt Rinasit. Prej aty, ai ka marrë avionin për të fluturuar drejt Athinës në Greqi. Po në të njëjtën datë, më 22 Shkurt, ai ka marrë sërish avionin dhe ka fluturuar nga Athina drejt Amsterdamit në Holandë.
Hetuesit dyshojnë se nga Holanda, Alwan udhëtoi me tren për në Gjermani, por akoma nuk është gjurmuar. Për lokalizimin dhe kapjen e 49-vjeçarit, uniformat blu kanë përcjellë informacion përmes Interpol.
Identifikimi i tij si autor i vrasjes së 24-vjeçares, erdhi nga gjurmimi i një numri gjerman, që Fadi Alwane kishte përdorur për të rezervuar apartamentin në Tiranë.
