Ditën e sotme, kryeministri britanik Sir Keir Starmer, zhvilloi një vizitë në Shtetet e Bashkuara të Amerikës, ku u takua me Presidentin Donald Trump.
Sipas mediave të huaja, Starmer thotë se vizita ka qenë “shumë e mirë dhe produktive” dhe shton se “është mirë të dihet se Mbretëria e Bashkuar ka një mik të vërtetë në Zyrën Ovale”.
Duke iu kthyer “rrezikut real në botë”, Starmer thotë se marrëdhënia midis dy vendeve ka më shumë rëndësi se kurrë.
“Ne mbetemi partneri i parë i njëri-tjetrit në mbrojtje, të gatshëm për t’i ardhur në ndihmë tjetrit, për t’iu kundërvënë kërcënimeve kudo dhe kurdo që ato shfaqen,” shton ai.
Sa i përket Ukrainës, Starmer thotë se ai mirëpret angazhimin “e thellë dhe personal” të Trump për të sjellë paqe dhe për të ndaluar vrasjer.
“Ju keni krijuar një moment të mundësisë së jashtëzakonshme për të arritur një marrëveshje historike paqeje, një marrëveshje që do të festohej në Ukrainë dhe në mbarë botën,” thotë ai.
Starmer thotë se Mbretëria e Bashkuar është gati të vendosë ‘çizmet’ në tokë dhe aeroplanët në ajër për të mbështetur një marrëveshje për Ukrainën, të realizuar bashkë me aleatët.
“Kjo është e vetmja mënyrë që paqja do të zgjasë,” shton ai.
Ai gjithashtu zbulon se Mbretëria e Bashkuar dhe SHBA kanë vendosur “të shkojnë më tej për të filluar punën për një marrëveshje të re ekonomike me teknologjinë e përparuar në thelbin e saj”.
“Çfarë theksi i bukur,” thotë Trump ndërsa Starmer përfundon fjalimin e tij. “Do të kisha qenë president 20 vjet më parë nëse do të kisha atë theks”, shton ai./ A2CNN
