Kryeministri britanik Keir Starmer po përballet me presion në rritje brenda Partisë Laburiste, pas humbjes së rëndë në zgjedhjet lokale të javës së kaluar.
Dhjetëra deputetë laburistë kanë kërkuar largimin e Starmer nga drejtimi i partisë dhe qeverisë, ndërsa disa zv.ministra kanë dhënë dorëheqjen, duke shtuar zërat për një krizë të brendshme politike në Britaninë e Madhe.
Megjithatë, Starmer deklaroi se nuk ka ndërmend të largohet dhe synon të vazhdojë drejtimin e qeverisë.
Situata ka sjellë krahasime me rrëzimin e ish-kryeministrit Boris Johnson në vitin 2022, kur dorëheqjet masive të ministrave e detyruan të largohej nga pushteti.
Sipas mediave britanike, mënyra më e lehtë për ndryshim do të ishte dorëheqja vullnetare e Starmer, çka do të hapte garën për zgjedhjen e liderit të ri të Partisë Laburiste.
Nëse kjo ndodh, një kryeministër i përkohshëm mund të zgjidhet deri në përfundimin e garës së brendshme. Mes emrave të përfolur është edhe ministri i Jashtëm David Lammy.
Ndërkohë, nëse Starmer refuzon të largohet, ai mund të përballet me një sfidë të drejtpërdrejtë nga deputetët e partisë së tij.
Mes emrave që përfliten si pasues të mundshëm janë ministri i Shëndetësisë Wes Streeting, ish-zëvendëskryeministrja Angela Rayner dhe kryebashkiaku i Manchesterit të Madh Andy Burnham.
Sistemi politik britanik lejon ndryshimin e liderit të partisë në pushtet pa pasur nevojë për zgjedhje të përgjithshme, edhe pse mandati parlamentar zgjat deri në vitin 2029.
