Në Kuvend po diskutohet pr.ligji që parashikon shtyrjen e afatit të dokumenteve biometrike të skaduara për emigrantët shqiptarë.
Ministri i Brendshëm, Ervin Hoxha prezantoi pr.ligjin, ku tha se prek 520 mijë votues që ndodhen jashtë territorit shqiptar dhe se kjo është një mundësi që të votojnë në zgjedhjet e 11 majit.
Sekretari i Përgjithshëm i Partisë Demokratike, Flamur Noka, gjatë fjalës së tij në Kuvend duke iu drejtuar mazhorancës tha se i ka zënë paniku, prandaj nuk po shtyjnë afatin e dokumenteve të skaduara edhe për shqiptarët që jetojnë brenda. Por sipas Nokës, është e drejtë e çdo qytetari që të votojë më 11 maj.
Edhe Berisha tha më herët se ky është një akt diskriminues pasi afati duhet të shtyhet edhe për zgjedhësit në Shqipëri. Ndërkohë, tha se duhet të shtyhet me 10 ditë data për regjistrimin e diasporës, pasi afati mbaron më 4 mars.
“Nuk kishim dëgjuar këtu në Parlament që “Edhe kur Perëndia bën gabim duhet ta dënojë Zoti”. Truri është gjë e madhe Petro. Këtë aktin normativ që keni sjellë ju, e dini çfarë është? Ky është një gjest i deklaruar urrejtje për çdo shqiptar që jeton në Republikën e Shqupërisë. Si mund të ndodhë që një qeveri të sjellë një akt normativ dhe të thotë që afati do shtyhet për ata që jetojnë jashtë. Po këta që jetojnë brenda? Nuk besoj se e bëni nga injoranca, besoj e bëni nga ligësia. E drejta e votës është e drejtë kushtetuese. Si mund të thuash që “këta që janë këtej do votojnë” dhe “këta që janë këtej nuk do votojnë”. Është detyrim kushtetues që të votojnë të gjithë qytetarët. E kuptoj që ju ka zënë paniku! Të shmangim sa më shumë të drejtat e shqiptarëve për të votuar”, tha Noka.
