Lionel Messi, është ndëshkuar financiarisht pas një konfrontimi të tensionuar me një nga trajnerët e New York City FC.
Incidenti ndodhi të shtunën pas ndeshjes hapëse të sezonit të ri të Major League Soccer (MLS), ku Inter Miami barazoi 2-2 me skuadrën nga New Yorku.
Sipas pamjeve të publikuara, Messi u afrua me nervozizëm drejt bankinës së skuadrës kundërshtare dhe e kapi në qafë njërin nga trajnerët pas përfundimit të ndeshjes.
Ky veprim çoi në një hetim nga Komisioni Disiplinor i MLS-së, i cili vendosi ta gjobisë Messin me një shumë që nuk është bërë publike.
Përveç Messit, edhe bashkëlojtari i tij te Inter Miami, Luis Suarez, u përfshi në një incident tjetër gjatë ndeshjes.
Sulmuesi uruguaian pati një përplasje me mbrojtësin e New York City-t, Birk Risa, për të cilën gjithashtu u gjobit nga autoritetet disiplinore të ligës.
Ky incident ka shkaktuar polemika të shumta në mediat sportive, ndërsa as Inter Miami dhe as MLS nuk kanë dhënë komente të detajuara mbi natyrën e masave disiplinore.
