Policia e Tiranës ka arrestuar dy persona, të cilët akuzohen se do të shisnin një armë zjarri pistoletë.
Në kuadër të operacionit të koduar “Flagranca” janë vënë në pranga shtetasit Prend Bala, 26 vjeç dhe Gentian Basha alias Seci, 37 vjeç, të dy banues në Tiranë.
Blutë e kryeqytetit raportojnë se ata po qarkullonin me një automjet, teksa pistolet posedohej nga 26-vjeçari Prend Bala, i cili kishte thyer dhe masën e sigurisë “Arrest në shtëpi”, për vjedhje.
Ndërkohë, 37-vjeçari Gentian Basha alias Seci ishte drejtuesi i automjetit dyshohet se do ta ndihmonte 26-vjeçarin, për të shitur armën. Raportohet se në momentin e ndalimit, ai ka kundërshtuar me dhunë punonjësit e Policisë dhe ka tentuar të largohej.
“Në vendin e quajtur “Zogu i Zi”, është ndaluar automjeti tip “Honda” me drejtues shtetasin G. B. dhe pasagjer shtetasin P. B. Gjatë kontrollit fizik, shërbimet e Policisë i gjetën shtetasit P. B., një armë zjarri pistoletë me krehër me fishekë, që dyshohet se e posedonte me qëllim shitjen në Tiranë. Në momentin e ndalimit të automjetit, shtetasi G. B. ka kundërshtuar me dhunë punonjësit e Policisë dhe ka tentuar të largohet. Nga verifikimet e mëtejshme rezultoi se shtetasi P. B. ishte me masë sigurie “Arrest në shtëpi”, për veprën penale “Vjedhja”.” – thuhet në njoftimin e Policisë.
Uniformat blu kanë sekuestruar armën e zjarrit pistoletë, 1 krehër me municion luftarak, 3 celularë dhe automjeti me të cilin po qarkullonin dy të arrestuarit.
Materialet procedurale i kaluan Prokurorisë së Tiranës për veprime të mëtejshme.
