Kryetari i bashkisë së Tiranës, Erion Veliaj u arrestuar ditën e djeshme me urdhër të SPAK.
Veliaj ndodhej në zyrën e tij kur mbërritën agjentët e BKH-së të cilët e shoqëruan drejt Bllokut të Sigurisë në rrugën “Mine Peza”.
Ditën e sotme, Veliaj është vizituar nga drejtori juridik i bashkisë së Tiranës, Alban Dokushi, i cili mban në duar një libër “Black Swan”, të cilin mesa duket ia ka dërguar Veliajt për ta lexuar në paraburgim.
“The Impact of the Highly Improbable” nga Nassim Nicholas Taleb, është një libër që analizon ndikimin e ngjarjeve të papritura dhe të rralla në histori, ekonomi dhe jetën e përditshme.
Taleb i quan këto ngjarje “Mjellmat e Zeza”, të cilat kanë tre karakteristika kryesore: Janë të paparashikueshme, askush nuk mund t’i parashikojë me saktësi përpara se të ndodhin.
Krijojnë ndikim të madh, kur ndodhin, ato ndryshojnë rrjedhën e historisë ose jetës. Shpjegohen vetëm pas ndodhjes, pas faktit, njerëzit përpiqen t’i justifikojnë si të pashmangshme, edhe pse më parë nuk i kishin parashikuar.
- ARRESTIMI
Erion Veliaj u arrestua ndërsa ishte në zyrën e tij, brenda Bashkisë së Tiranës, nën dyshimet se së bashku me gruan e tij, Ajola Xoxa kanë kryer korrupsion me fondet publike në të paktën 10 raste. Prokurorët, Olsi Dado dhe Altin Dumani thonë se kanë qenë kompanitë e zotëruara de facto e de jure nga Ajola Xoxa ato që kanë bërë të ligjshme miliona lekë.
Nga ana e tij SPAK e thotë se Xoxa ka kryer të njëjtat krime si burri i saj, por njëherazi edhe ka fshehur origjinën e parave. Ndërsa Veliaj, sipas prokurorisë, ishte vendimtar në këtë skemë.
Në skemën e zbërthyer nga SPAK doli zbuluar edhe roli i bashkëpunëtorëve të ngushtë të Veliajt. Mes tyre bën pjesë, biznesmeni i arrestuar, Elman Abule që përmes kompanisë Remetal ka kryer pastrim parash. Masa më të buta sigurie, Prokuroria Speciale ka lëshuar edhe për biznesmenët, Fatmir Bektashi, Shkëlqim Fusha, Gentian Sula, Meriman Palushi dhe Sokol Kryeziu.
Në bashkëpunim ata akuzohen për korrupsion aktiv të funksionarëve të lartë shtetëror. SPAK njofton gjithashtu se Gjykata Antikorrupsion sekuestroi rreth 870 mijë euro të Ajola Xoxës, në dy llogari bankare. Një tjetër gjetje e prokurorisë ishin shpenzimet e larta të saj në blerjet online.
