Trajneri i Manchester City, Pep Guardiola, kërkon nga skuadra e tij të bëjë kujdes nga Real Madridi, pasi bëhet më i rrezikshëm kur gjendet në një moment negativ.
“Qytetarët” ndeshen në stadiumin “Etihad” kundër “Los Blancos” të martën në mbrëmje në sfidën e parë play-of të raundit të eliminimit direkt në Ligën e Kampioneve.
Reali nuk do të ketë të disponueshëm për këtë përballje mbrojtësit Carvajal, Rudiger, Militao dhe Alaba.
Kjo është hera e katërt radhazi që të dyja ekipet ndeshen në fazën e eliminimit direkt, që nga viti 2020.
“Të dyja ekipet kanë pasur probleme për sa i përket dëmtimeve gjatë sezonit. Madridi e ka menaxhuar atë më mirë se sa ne, pasi ata janë ende në krye të La Liga-s. Jemi përballur shpesh me ta dhe e dimë se në momentet më të vështira ata japin më të mirën e tyre! Duhet të bëjmë dy ndeshje të mira që të kualifikohemi!-, tha Guardiola në konferencën për shtyp përpara takimit.
Në këtë sezon, City është në vend të pestë në renditjen e Premier League dhe ka një diferencë prej 15 pikësh me Liverpool-in kryesues. Sipas teknikut Guardola, do të jetë shumë e vështirë që të bllokohen sulmuesit e Realit, që sipas tij janë të jashtëzakonshëm dhe shumë të zotë me topin.
