Nga filmimet e kamerave të sigurisë, 25-vjeçari Romario Brunga, i cili u gjet i vrarë brenda automjetit të tij në rrugën e vjetër të Balldrenit në Lezhë, është parë duke komunikuar vazhdimisht me telefon, gjatë kohës që udhëtonte nga puna në drejtim të banesës së tij.
Personi i fundit që ka komunikuar me të ka qenë shoku i tij i ngushtë. Burime bëjnë me dije se shoku i viktimës ka dëshmuar se Romario Brunga i ka deklaruar “Kam një hall shumë të madh.” Pas kësaj bisede, ai ka mbyllur telefonin dhe nuk iu është përgjigjur më thirrjeve të mikut të tij.
Policia ka sekuestruar telefonin për të hapur tabulatet apo për të parë nese ka mesazhe që identifikojnë shkaqet që mund të kenë çuar drejt vetëvrasjes 25-vjeçarin, nëse do të rezultojë e tillë.
Ai punonte si kamarier në zonën e Balldrenit dhe kishte vetëm pak kohë që ishte kthyer nga Spanja, teksa në muajin Gusht të vitit të kaluar ishte martuar.
Nga hetimet e kryera nga Policia e Lezhës ka rezultuar se Romario Brunga kishte vetëm një plagë plumbi në ballë dhe një gërvishtje në dorë. Ndërkohë, automjeti i tij nuk ka patur asnjë dëmtim nga pjesa e jashtme. Pistoleta e gjetur pranë dorës së viktimës ka qenë e mbushur.
Ngjarja dyshohet se ka ndodhur rreth orës 15:00, ndërsa trupi i pajetë është gjetur nga të afërmit dy orë më vonë.
Detajet e mësipërme kanë ngritur dyshime tek grupi hetimor i ngritur nga Policia e Lezhës se kemi të bëjmë me një vetëvrasje, teksa po punohet për gjetjen e shkaqeve që e kanë çuar drejt këtij akti ekstrem.
Familjarët dhe të afërmit e të ndjerit kanë deklaruar se i riu nuk kishte treguar për ndonjë problem apo të kishte shfaqur shenja depresioni kohët e fundit.
