Banorët e fshatit Tragjas në Vlorë kanë dalë këtë të mërkurë në protestë, ku kundërshtojnë projektin e Agjencisë Kombëtare të Ujësjellës-Kanalizimeve marrjemn e burimeve të ujit të fshatit për të furnizuar resortet në bregdetin e Dhërmiut.
Punimet për këtë projekt filluan disa ditë më parë, por komunitetit nuk i është dhënë asnjë informacion. Madje nuk ka as tabela informuese dhe as mbledhje konsultative me banorët.
Një prej banorëve tregon se ata kanë takuar vetëm përfaqësues të firmës private që po kryen punimet dhe jo zyrtarët e institucioneve. Ai ankohet se edhe vetë fshati ka vetëm 40 minuta në ditë ujë.
“Këta të firmës na janë prezantuar, kemi bërë disa takime, por nuk dimë asgjë, thjesht na kanë thënë që do marrim ujin, do të ndërtojmë këtu, është vepër shteti dhe kaq. Ky ujë do të shkojë në bregdet, në Dhërmi. Ne nuk jemi kundër, por le ta marrin aty poshtë tek përroi se këtu na bën një dëm të jashtëzakonshëm. Se është një vend ku bujqësia është goxha e zhvilluar, por edhe fshati vetë 40 minuta ujë në 24 orë ka dhe nuk shkon. Për këtë shqetësim jemi.” – tha një prej protestuesve.
Banorët e Tragjasit kanë nisur nënshkrimin e një peticion drejtuar Ministres së Mjedisit dhe Kryeministrit, ku kërkojnë të ndalohen punimet për marrjen e ujit nga burimi dhe po kërkojnë investime për zhvillimin e fshatit.
