Ende nuk ka asnjë gjurmë nga 49-vjeçari nga Çorovoda me banim në Tiranë, Daut Laze, i cili u arratis një natë më parë nga burgu i Shënkollit në Lezhë.
Autoritetet kanë vendosur 10 mijë euro shpërblim për këdo që jep informacion të vlefshëm për kapjen Daut Lazes, por deri më tani ky vedndim duket se nuk ka ndihmuar për të çuar në lokalizimin e tij.
Familjarët e Daut Lazes që jetojnë në zonën e Astirit në Tiranë shprehen se nuk kanë dijeni se ku ndodhet ai, pasi nuk kanë pasur asnjë kontakt me të që në momentin që janë njoftuar për arratisjen.
E pyetur nga gazetarët, nëna e Lazes ka mohuar që të ketë pasur ndonjëlloj kontakti me të birin pas arratisjes së këtij të fundit nga burgu i Shënkollit.
“Nuk kemi asnjë haber fare, por të kisha do të thosha”, është shprehur e ëma e Lazes për gazetarët.
Daut Laze ishte arrestuar që prej 16 Nëntorit të vitit 2021 për veprën penale “Dhuna në familje” dhe më 4 nëntor të vitit të kaluar Gjykata e Tiranës kishte vendosur ndaj tij masën mjekësore “Mjekim i detyruar në një institucion mjekësor”. Dyshohet se ai vuan nga probleme të shëndetit mendor.
Ai ishte shtruar në dhomën e mjekimeve të burgut të Shënkollit, ku dyshohet të ketë shfrytëzuar mundësinë për t’u arratisur. Nga hetimet paraprake, rezulton se ai ka kapërcyer murin në anën jugore të burgut dhe është arratisur.
Mungesa e tij në burg është konstatura mëngjesin e djeshëm gjatë ndërrimit të turneve dhe kryerjes së apelit në burgun e Shënkollit në Lezhë.
Në lidhje me arratisjen e 49-vjeçarit janë arrestuar tre gardianë të burgut të Shënkollit. Në pranga janë vënë shtetasit Gjin Ndoka, punonjës shërbimi në kupole, Mark Nikolli punonjës ne sektor (grup sigurie) dhe Zhaneta Mella (operatore kamerash). Kjo e fundit është shtruar në spital, pasi pas ndalimit ka shfaqur probleme shëndetësore.
Ndaj tyre është ngritur akuza për veprën penale “shpërdorim detyre”, pasi në momentin e arratisjes së Daut Lazes kanë qenë në shërbim dhe nuk kanë përmbushur detyrat e përcaktuara me ligj.
