Gledi Hoxhallari për rreth një muaj vijon të qëndrojë në gjendje të rëndë shëndetësore në spital, pasi u qëllua me armë zjarri nga i dashuri i bashkëshortes së tij. Me këtë të fundit, 40-vjeçari ishte në proces divorci.
Ai duhet t’i nënshtrohet një ndërhyrjeje kirurgjikale në ezofag, e cila kushton dhe familja apelon për ndihmë pasi nuk mund të përballojë më shpenzimet mjekësore.
Miqtë dhe familjarët e Hoxhallarit kanë hapur një ‘GoFundMe’, me shpresën se do të mblidhet shuma e nevojshme për të siguruar trajtimin e nevojshëm për t’i shpëtuar atij jetën.
40-vjeçari Gledi Hoxhallari, u plagos më 5 janar, dyshohet nga shtetasi Klement Beqaj, 25 vjeç, i cili ishte në një lidhje me bashkëshorten e 40-vjeçarit, Melisa Beluli.
Çifti ishin në proces divorci dhe kishin nisur procedurat për ndarjen. Ka qenë djali i çiftit, vetëm 10 vjeç, ai që ka telefonuar të ëmën dhe i ka kërkuar që ta marrë.
Duke qenë se çifti ishin në proces divorci, djali rrinte gjatë ditës me të atin dhe në mbrëmje shkonte tek nëna. Telefonata ka qenë e tensionuar, dhe më pas 29-vjeçarja ka shkuar së bashku me të dashurin në lokalin ku gjendej 40-vjeçari.
25-vjeçari ka goditur bashkëshortin e të dashurës. Ngjarja ka ndodhur në sy të djalit të tyre të mitur. Beqaj dhe Beluli më pas janë arratisur ku janë ende në kërkim.
