Presidenti i përkohshëm sirian, Ahmed al-Sharaa, ka dalë në një deklaratë për mediat pas rënies së Bashar al-Assad gati dy muaj më parë.
Ai ka deklaruar se do të punojë për të formuar një qeveri gjithëpërfshirëse që përfaqëson komunitete të ndryshme, e cila do të ndërtojë institucionet dhe do të qeverisë vendin deri në mbajtjen e zgjedhjeve të lira dhe të ndershme.
Presidenti i përkohshëm i Sirisë konfirmoi mbajtjen e një konference të dialogut kombëtar gjatë fjalimit të tij të parë drejtuar kombit.
“Ne do të shpallim në ditët në vijim një komision që do të ketë për detyrë të përgatisë konferencën e dialogut kombëtar, një platformë e drejtpërdrejtë për diskutime, për të dëgjuar pikëpamjet e ndryshme për programin tonë të ardhshëm politik”, tha ai në fjalimin e tij të shkurtër të transmetuar nga disa rrjete televizive.
Më pas, siç tha ai, do të vijë procesi i hartimit të Kushtetutës së re, që sipas tij mund të zgjasë deri në katër vjet. Koha që do të duhet deri në mbajtjen e zgjedhjeve është po katër vite. Ai tha se do të formonte një organ të vogël legjislativ për të mbushur vakumin parlamentar deri në mbajtjen e zgjedhjeve, pas shpërbërjes së parlamentit sirian të mërkurën.
Presidenti sirian theksoi se ai “dëshiron të ruajë paqen midis qytetarëve dhe unitetin territorial të vendit”.
Presidenti premtoi gjithashtu se do të “ndiqte penalisht kriminelët që derdhën gjakun sirian dhe kryen masakra dhe krime qofshin ata brenda apo jashtë vendit” dhe u zotua të vendosë “drejtësi të vërtetë në këtë periudhë tranzicioni”.
