Një burrë që ishte kthyer së fundmi në Pakistan me familjen e tij nga SHBA-ja, ka rrëfyer se ka qëlluar dhe vrarë vajzën e tij adoleshente, sepse e ka indinjuar përmbajtjen e postimeve të saj në TikTok.
Sipas mediave të huaja, 15-vjeçarja, e lindur në Amerikë, u vra në një rrugë në qytetin e Quetta të martën. I dyshuari, Anwar ul Haq, fillimisht pretendoi se ajo u qëllua nga persona të armatosur të panjohur, por më vonë pranoi krimin, tha një oficer policie, Babar Baloch.
“Deri më tani hetimet tona tregojnë se familja nuk ishte dakord me veshjet, mënyrën e jetesës dhe kontaktet e (viktimës) në faqet e rrjeteve sociale”, tha një tjetër oficer policie, Zohaib Mohsin. “Ne kemi celularin e saj. Është i mbyllur. Po hetojmë të gjitha mundësitë, madje edhe krimin e nderit”, shtoi ai.
Familja jetoi në SHBA për 25 vjet dhe së fundi u kthye në provincën Balochistan të Pakistanit. Sipas Baloch, babai tha se vajza e tij kishte filluar të krijonte përmbajtje “të kundërshtueshme” në TikTok kur ata jetonin ende në SHBA dhe se ajo vazhdoi të ngarkonte video pasi u kthyen në Pakistan.
Kunati i Anwar ul Haq u arrestua gjithashtu me akuzën e bashkëpunimit, shkruan A2 CNN.
Anwar ul Haq thotë se ai është një shtetas amerikan, por policia nuk ka asnjë provë për këtë përveç garancisë së të dyshuarit. Nuk është e qartë nëse Ambasada Amerikane është informuar për arrestimin e tij.
Më shumë se 54 milionë njerëz përdorin TikTok në Pakistan, një vend me 241 milionë banorë. Qeveria ka bllokuar disa herë aksesin në aplikacion gjatë viteve të fundit, duke përmendur “përmbajtje të turpshme”.
Të paktën 1000 gra vriten çdo vit në Pakistan, shumica prej tyre nga të afërmit e tyre, për përdhosje të “nderit” të familjes.
