Një pyetje që përsëritet shpesh, por këtë vit më shumë se kurrë, është e ardhmja e Carlo Ancelotti-t. Zërat për një kalim të mundshëm të tij në pankinën e Kombëtares së Brazilit nuk janë harruar, edhe pse datojnë që prej një viti.
Por nëse do të fitonte La Ligën ose Ligën e Kampionëve, a mund ta linte vërtet Real Madrid “Mbreti Carlo”?
Kësaj pyetjeje i është përgjigjur vetë Ancelotti gjatë konferencës për shtyp në prag të ndeshjes kundër Brestit: “Klubi dhe unë duam të vazhdojmë bashkë sa më gjatë të jetë e mundur. Nëse ndodh diçka e çuditshme, mund të ketë ndryshime. Kjo ndodh shpesh në futboll, por po punojmë mirë. Klubi ka besim në punën time dhe unë kam besim në atë që më ofron klubi në të gjitha aspektet.
Tani për tani, po mendojmë të bëjmë një sezon të mirë. Pavarësisht vështirësive, situata është e mirë. Shumë njerëz harrojnë që ende kemi lojtarë të dëmtuar. Lojtarët po tregojnë një qëndrim pozitiv dhe kemi besim në sezonin tonë.”
Ndërkohë, Ancelotti duket më i qetë krahasuar me javët e trazuara kur Real Madrid ishte në telashe në Champions League dhe larg kreut të La Liga-s. Por ka një arsye specifike për këtë: “Ka të bëjë me ekipin, me përmirësimin e tij. Nuk jemi ende në nivelin tonë më të mirë, por jemi shumë afër. Të gjithë e kemi të qartë çfarë duhet të bëjmë dhe jemi përmirësuar si ekip. Por edhe individualitetet po na japin shumë. Sidomos Mbappé, sigurisht, por pa harruar Rodrygo, Bellingham… Vinicius! Të gjitha këto janë ato që më bëjnë të ndihem më i qetë.”
