Policia e Durrësit ka finalizuar operacionin policor të koduar “Latitant”, duke kapur dhe arrestuar një shtetas të shpallur në kërkim ndërkombëtar nga autoritetet italiane.
Shtetasi i arrestuar, Erjon Meshi alias Arjon Mema 32 vjeç, është kërkuar nga autoritetet italiane për akuzat e “Mbajtjes së paligjshme, shitjes, prodhimit, shpërndarjes dhe trafikimit të lëndëve narkotike” dhe “Pjesëmarrjes në grup kriminal, me qëllim trafikimin e lëndëve narkotike”, sipas Kodit Penal të Italisë.
Gjykata e Trentos ka caktuar ndaj tij masën e sigurisë “Arrest me burg”.
“Gjatë operacionit, u lokalizua, u kap dhe u arrestua provizorisht, për t’u ekstraduar në Itali, shtetasi i shpallur në kërkim ndërkombëtar E. M. alias A. M., 32 vjeç. Gjykata e Trentos i ka caktuar këtij shtetasi, masën e sigurisë “Arrest me burg”, për veprat penale “Mbajtje e paligjshme, shitje, prodhim, shpërndarje dhe trafikim i lëndëve narkotike” dhe “Pjesëmarrja në grup kriminal, me qëllim trafikimin e lëndëve narkotike”, parashikuar nga Kodi Penal i Italisë”, njofton policia.
Operacioni ka pasur një bashkëpunim të ngushtë mes Interpol Tirana dhe Interpol Roma, të cilët po koordinojnë procesin e ekstradimit të tij në Itali për të përballuar akuzat.
