Është gjetur pa shenja jete pas rreth një jave 63-vjeçari Engjëll Kanani nga Berati, u zhduk teksa kishte dalë për peshkim së bashku me një mik në lumin Vjosa.
Mësohet se trupi i tij është gjetur në tokat e fshatit Kafaraj, teksa dyshohet se ka pësuar infarkt. Engjëll Kanani është baba i dy fëmijëve. Ai dhe miku i tij, të dy me banim në Berat, prej tre vitesh ushtronin peshkim amator në lumin Vjosë.
Ditën e zhdukjes, të enjten e javës që shkoi, dy shokët janë parë të peshkonin në vende të ndryshme të zonës së Kashishtit. Sipas dëshmisë së mikut të tij në polici, ata kishin caktuar një orar dhe vend për t’u takuar, por Kanani nuk u paraqit në vendtakim.
Pas disa orësh, kur 63-vjeçari nuk iu përgjigj telefonatave, miku i tij raportoi zhdukjen në polici. Celulari i të ndjerit ka qëndruar i hapur deri 24 orë pas zhdukjes së tij. Familjarët e kanë telefonuar vazhdimisht në numrin e tij, por megjithëse telefoni binte, askush nuk përgjigjej.
