Policia e Vlorës ka arrestuar 3 persona, të cilët dyshohen si autorë për 5 raste të vjedhjes dhe një rast i tentativës për vjedhje brenda 11 ditësh në qytetin bregdetar.
Në kuadër të operacionit të koduar “Target 6” janë vënë në pranga shtetasit Klodjan Dule, 30 vjeç, Gëzim Çuçaj, 28 vjeç dhe Franko Pulaj, 30 vjeç, të tre banues në Vlorë, të cilët akuzohen për veprën penale “Vjedhja”, kryer në bashkëpunim.
Autoritetet policore raportojnë se nga veprimet hetimore dyshohet se këta shtetas, të maskuar me kapuçë dhe shalle, duke përdorur dorashka dhe sende të forta, kanë kryer vjedhje në qytetin e Vlorës, më konkretisht:
-Më 10.01.2025, në lagjen “Partizani”, kanë thyer xhamin e një automjeti tip “Mercedes Benz” ku kanë vjedhur një palë syze me vlerë 400 euro dhe një parfum me vlerë 50 euro;
-Më 13.01.2025, në lagjen “Partizani”, kanë vjedhur disa steka me cigare në një dyqan;
-Më 18.01.2025, në lagjen “Hajro Çakërri”, kanë vjedhur 20 000 lekë dhe steka me paketa me cigare me vlerë 80 000 lekë në një dyqan;
-Më 19.01.2025, në lagjen “15 Tetori”, kanë vjedhur 16 000 lekë në një market;
-Më 21.01.2025, në lagjen “24 Maji”, kanë vjedhur 30 000 lekë dhe paketa me cigare në një dyqan;
-Më 21.01.2025, në lagjen “Lef Sallata”, kanë tentuar të vjedhin në një subjekt financiar jobankar.
Në cilësinë e provës materiale janë sekuestruar disa sende të vjedhura, mjetet dhe veshjet e përdorura nga autorët, për kryerjen e vjedhjeve. Materialet procedurale i kaluan Prokurorisë së Vlorës për veprime të mëtejshme.
