Edi Martini dhe Teuta kanë ndarë rrugët. Lajmi është bërë publik nga klubi durrsak, nëpërmjet një postimi në rrjetet sociale.
Edi Martini u ul për herë të pestë në stolin e Teutës më 26 shtator 2023 dhe gjatë kësaj periudhe e ka drejtuar ekipin në 56 takime, me një mesatare prej 1.3 pikësh për ndeshje.
Humbja e fundit 0-2 nga Partizani fundjavën e shkuar në “Niko Dovana” ka rezultuar fatale për trajnerin shkodran që sheh të mbetet i papunë.
Kjo ka qenë periudha e pestë për të në krye të stolit durrsak. Për herë të parë ai e drejtoi Teutën në sezonin 2010-11 dhe më pas në sezonet 2019-2021, 2021-22, 2022-23 dhe 2023-2025.
Njoftimi i Teutës:
“Klubi i futbollit Teuta njofton përfundimin e bashkëpunimit me trajnerin Edi Martini. Gjatë këtij sezoni, Martini ka dhënë kontributin e tij në drejtimin e ekipit. E falënderojmë për punën dhe përkushtimin e tij dhe i urojmë suksese në karrierën e tij të mëtejshme. Në ditët në vijim, do të zyrtarizohet trajneri i ri që do të drejtojë ekipin tonë në sfidat e ardhshme”.
Kujtojmë se do të jetë Bledar Devolli ai që do të marrë vendin e shkodranit te Teuta. Devolli mbylli aventurën e tij në Kosovë me Lirinë e Prizrenit dhe është gati të marrë në dorë “frenat” e Teutës në Superiore.
