Myrto Uzuni është tashmë çështje te Granada. Sulmuesi i Kombëtares shqiptare nuk po stërvitet me skuadrën spanjolle, ndërsa pret nga klubi të pranojë ofertën e Austin për transferimin në Amerikë.
Drejtori i përgjithshëm i Granadës, Alfredo Garsia Amado, ka thyer heshtjen. Ai ka treguar se nga Austin ka mbërritur oferta e 9 milionë dollarëve, por për ta lënë të lirë duhen paguar 12 milionë euro. Kjo shifër përkon dhe me klauzolën e prishjes së kontratës.
“Uzuni dëshiron të largohet, ky është realiteti, ai mori një ofertë shumë interesante nga Austin i MLS dhe na tha disa javë më parë se dëshiron të largohet. Ai thotë se nuk dëshiron të stërvitet me grupin dhe se dëshiron të largohet, është një situatë e vështirë.
Unë e respektoj që një profesionist dhe një lojtar do të përmirësohet, dhe nëse mund të gjendet një zgjidhje pozitive për të dyja palët, atëherë perfekte, por gjithmonë duke përmbushur detyrimin tuaj, gjë që nuk e ndaj fare me Myrton dhe po më befason.
Ka rregullore dhe një kontratë të nënshkruar. Myrto ka pasur dy përmirësime në kontratë dhe ka kushte kontraktuale me klauzolë ndërprerjeje dhe kohëzgjatje deri në qershor 2027, duhet të merremi me këtë.
Jemi në merkato dimërore, është një situatë shumë e komplikuar. Uzuni është një lojtar shumë i rëndësishëm, Granada po mbron klubin dhe stemën. I kemi thënë që për të shkuar duhet të paguajë klauzolën e ndërprerjes, nuk ka negociatë tjetër.
Kanë bërë disa oferta, por shuma që nuk arrijnë atë që duam, që është klauzola. Oferta e fundit e fortë është 9 milionë dollarë dhe unë u kam dërguar 12 milionë euro, ne jemi këtu për të mbrojtur interesat e klubit”, u shpreh Alfredo Garsia Amado.
