Gjatë vitit 2024 një prej produkteve më të eksportuara ishte energjia elektrike në vlerë afro 150 milionë euro. Ndërkaq, Kosova ka importuar më së shumti naftë dhe vajra, ku vlera e tyre arrin shifrën mbi 710 milionë e 300 mijë euro.
Kosova ka eksportuar mallra në vlerë 889 milionë euro, ndërsa, ka importuar mallra me vlerë 6.38 miliardë euro, gjatë vitit që lamë pas.
Në vitin 2024, një prej produkteve më të eksportuara ishte energjia elektrike në vlerë afro 150 milionë euro, pasuar nga artikujt dyer e dritare në vlerë mbi 98 milionë euro. Derisa artikujt shufra prej hekurit zënë vendin e tretë në vlerë prej 93 milionë euro.
Kosova ka importuar gjatë vitit 2024 energji elektrike në vlerë prej 81,824,924 euro nga Shqipëria, nga Maqedoni e Veriut 52,295,490 euro, nga Mali i Zi 4,366,839 euro, Sllovenia 3,015,287 euro, nga Danimarka 746,494 euro dhe nga Serbia 163,439 euro.
Në bazë të të dhënave zyrtare të Doganës së Kosovës, vendin e katërt nga produktet më të eksportuara nga Kosova e zënë mobilieritë, krevatët dhe dyshekët në vlerë mbi 92 milionë euro.
Rënie e vlerës së eksportit, krahasuar me vitin 2023, vërehet te produktet e plastikës dhe mobilierive e dyshekëve.
Ndonëse gjatë vitit 2023, vendin e parë për eksport e mbanin këta artikuj (dyshekët) në vlerë mbi 146 milionë euro.
Ndërkaq, Kosova gjatë vitit 2024 ka importuar më së shumti naftë dhe vajra, ku vlera e tyre arrin shifrën mbi 710 milionë e 300 mijë euro.
Pas kësaj, me afro 678 milionë euro, Kosova ka blerë vetura dhe mjete të tjera të transportit.
Vendin e tretë në import e zënë makineritë, veglat e punës, auto-pjesët e të tjerë të ngjashme në vlerë prej 464 milionë euro.
Sipas të dhënave të Doganës së Kosovës vitin 2024 Kosova ka importuar vetura më shumë, mbi 90 milionë euro, krahasuar me vitin 2023.
Nga janari deri në fund dhjetorit më 2024, Kosova eksportoi mallra në vlerë prej 889 milionë euro e 302 mijë euro, ndërsa importi ishte 6 miliardë e 38 milionë euro.
Në vitin 2023 vlera e eksporteve ka qenë 819 milionë euro, importi po ashtu 5 miliardë 878 milionë euro.
Në vitin 2022 eksportet kanë qenë 920 milionë euro, importet 5 miliardë e 639 milionë euro, më 2021 ishin 755 milionë eksporte, kurse importet 4 miliardë e 684 milionë euro.
Më 2020, vlera e eksporteve 474 milionë euro, 3 miliardë e 296 milionë importe.
Kosova importon gati të gjitha produktet nga vendet e rajonit, të BE-së dhe më larg.
Mesatarisht në vit, ajo importon mallra në vlerë prej 5 miliardë eurosh – duke filluar nga produktet bazë deri tek ato ndërtimore – ndërsa eksporton nën vlerën e 1 miliard eurove – më së shumti produkte të metalit dhe plastikës./MONITOR
