Zbardhen dëshmia të tjera të të penduarit të drejtësisë, Nuredin Dumanit në GJJKO. Sipas burimeve të mediave, edhe këtë të martë i penduari i drejtësisë po jep detaje sesi ka dalë nga burgu.
Mësohet se Nuredin Dumani ka deklaruar se: “Kam paguar para që të dilja nga burgu, kisha avokat Alban Bengasin. Më ka ndihmuar dhëndri i vëllait të Nasipit, që është mjek”, ka dëshmuar ai.
Sipas dëshmitarit të drejtësisë, ndërmjetës për ta liruar nga burgu ka qenë avokati Alban Brengasi. Dumani po dëshmon edhe për avokatin dhe sesi ky i fundit pagoi para për të dhunuar bashkëshorten e tij.
Më tej ka shpjeguar se e ka ndihmuar dhe një mjek ligjor dhe u lirua në vitin 2014, por veprimet kishin nisur më herët, me ndihmën e avokatit.
“I bënë letrat sikur isha për të vdekur. Dhe më nxorën nga burgu gjasme vuaja nga zemra”, ka vijuar Dumani dëshminë e tij.
Gjithashtu Dumani ka shpjeguar se dhëndri i vëllait të Nasip Naços në atë kohë ka qenë shef i spitalit, kurse ai ishte arrestuar për pengmarrje. Për të dalë nga qelia ka paguar 40 mijë euro.
Por pasi siguroi dokumentin për probleme shëndetësore u lirua.
Dumani u përplas me Gentian Sharrën, i akuzuari: Kisha para, mora 2 mln € tendera
Në seancën e mëparshme, Dumani ka vijuar të kundërshtohet me tone të ashpra nga të arrestuarit, për të cilët ka rrëfyer se në bashkëpunim me ta ka kryer krime.
Një ndër ta, Gentjan Sharra, ka pretenduar se në kohën kur e implikon Dumani, ai ka pasur biznese, ka marrë tendera 2 milionë euro, ka poseduar një automjet 50 mijë euro dhe pse duhet të kishte nevojë të merrte pjesë në një grabitje për të përfituar disa mijëra euro, të cilat do të ndaheshin.
Petrit Qoli, një tjetër i arrestuar, pretendoi se prej 3 vitesh mbahet i arrestuar nga deklarimet e Dumanit dhe ka lënë jashtë një grua që e dashuron.
Ndërkohë, Enver Diva i ka kërkuar gjykatës që, pas përfundimit të dëshmisë së Dumanit, që po kontestohet qoftë nga të arrestuarit, por edhe nga avokatët, gazetarët të lejohen në sallë për të pasqyruar versionin e tyre.
Dumani: Ja lokali që frekuentohej nga politikanë e ministra
Në dëshminë e tij në seancat e kaluara në GJKKO, Nuredin Dumanit, vrasësit me pagesë, sot bashkëpunëtor i drejtësisë në procesin gjyqësor për dosjen “Plumbi i Artë”, ka rrëfyer disa episode kriminale që janë renditur në dosjen e SPAK, si dhe ka vijuar përplasja mes tij dhe të pandehurve apo avokatëve në proces.
Dumani deklaroi se me Festim dhe Petrit Qolin është bërë mik në vitin 2013 e në vazhdim, pasi ata paguan avokatin dhe ndërhynë në sistemin e drejtësisë për ta nxjerrë nga burgu me një raport mjekësor si i sëmurë.
Po ashtu, gjatë seancës mësohet se Nuredin Dumani deklaroi se lokali i Qolëve frekuentohej nga politikanë e ministra, por pa përmendur emra.
Nga ana tjetër, Gentjan Sharra ka kundërshtuar një dëshmi të Dumanit, teksa ky i fundit e implikoi në një ngjarje kriminale, pasi në deklarimet fillestare para prokurorëve nuk e kishte përmendur.
Ndërkohë, Petrit Qoli që seancën e kaluar tha se po mbahet në burg me pa të drejtë, duke lënë jashtë një grua që e dashuron. Në seancën e kësaj të enjte, ai tha se do të lutet për dy prokurorët e SPAK të cilët i konsideron si anëtarë të familjes.
