Boksieri britanik Tyson Fury ka befasuar të gjithë sot pasdite me vendimin e tij, duke deklaruar tërheqjen e tij nga sporti. Një vendim me efekt të menjëhershëm për 36-vjeçarin, ish-kampion bote në peshën e rëndë.
Në 37 duele të zhvilluara në karrierën e tij ai ka arritur 34 fitore (24 me KO), 2 humbje dhe një barazim. Vendimi për tërheqje vjen pas dy humbjeve të pësuara me ukrainasin Oleksandr Usyk, të dyja vitin e kaluar.
Një lajm i papritur ky nga Fury, ndërkohë që vetëm dy ditë më parë, menaxheri e promotori i njohur i boksit Eddie Hearn pat deklaruar se është prenotuar stadiumi “Wembley” për një duel mes tij dhe Anthony Joshua këtë verë.
“Do të doja të njoftoja tërheqjen time nga boksi”, tha Fury në një video postim në Instagram. Më tej ai shtoi: “Ishte një kënaqësi. Më ka pëlqyer çdo minutë e tij dhe do ta përfundoj me këtë – Dick Turpin mbante një maskë!”
Duhet theksuar se kjo nuk është hera e parë që Fury njofton tërheqjen e tij. Në prill të vitit 2022, pasi mundi Dillian Whyte, britaniku tha se do të varte dorezat. Ai u kthye gjashtë muaj më vonë për të luftuar Derek Chisora në një ndeshje trilogjike në stadiumin e Tottenham.
View this post on Instagram
