Ka përfunduar të premten në mesnatë afati 30 ditor i paraqitjes së kandidaturave për anëtar të Gjykatës Kushtetuese për vendin vakant të Holta Zaçaj, që përfundon me 10 mars 2025.
Burime për VNA bëjnë me dije se në garë janë 11 kandidatë, që janë pjesë e gjyqësorit, ish-anëtarë të Këshillit të Lartë të Prokurorisë e atij gjyqësor si dhe avokatë apo juristë. Irena Nino dhe Florin Ballhysa janë dy komisionerët publikë të cilët kanë shprehur interesin për vendin vakant në Kushtetuese. Nurihan Seiti, ish-anëtare e KLP-së është një tjetër kandidaturë, po ashtu dhe Alban Toro ish-anëtar i KLGJ. Klodian Rado, Rezana Balla, Sinan Tafaj kanë paraqitur kërkesë.
Një tjetër kandidate është Genta Bungo ish-kryetare e Komisionit të Pavarur të Kualifikimit që bëri procesin e vettingut për gjyqtarë e prokurorëve. Asim Vokshi, gjyqtar është në garë për këtë vend. Lista me emrat e kandidatëve do të bëhet publike të hënën dhe më pas emrat kalojnë për verefikim pranë Këshillit të Emërimeve në Drejtësi që bën dhe renditjen finale të tyre.
Holta Zaçajt i përfundon mandati si gjyqtare kushtetuese me 10 mars. Ajo refuzoi të largohej, me argumentin se mandati i saj përfundonte në fund të 2025. Por Sokol Sadushi i gjykatës së Lartë si organ emërtese shpalli vakancën e më pas trupa e gjyqtarëve kushtetues votoi për mbarimin e mandatit të Zaçaj, duke i dhënë kështu zgjidhje konfliktit të krijuar mes Kushtetueses dhe Gjykatës së Lartë.
