Presidenti i zgjedhur Donald Trump vendosi të hënën ta frenojë dhënien e dënimit të planifikuar për këtë javë për çështjen gjyqësore për pagesat e bëra në këmbim të heshtjes së një gruaje përpara zgjedhjeve të vitit 2016. Ndërkohë, ai gjithashtu do ta apelojë vendimin e gjyqtarit që e mbajti në fuqi vendimin e paprecedentë dhe krijoi me të gjitha gjasat mundësinë që ai të bëhet presidenti i parë që merr detyrën ndërsa është gjendur fajtor për një vepër penale.
Avokatët e Presidentit të zgjedhur Trump thanë se do t’i kërkojnë gjykatës së apelit të Nju Jorkut ta anulojë vendimin e javës së kaluar të gjykatësit të Manhattanit, Juan M. Merchan, i cili caktoi ditën e premte për të dhënë dënimin – pra pak më shumë se një javë përpara inaugurimit të presidentit të zgjedhur.
Gjykatësi Merchan rrëzoi kërkesën e Presidentit të zgjedhur Trump për ta anuluar vendimin e 30 majit, për shkak të rikthimit të tij të afërt në Shtëpinë e Bardhë. Avokatët e zotit Trump thanë se do të apelojnë gjithashtu një vendim paraprak në të cilin gjykatësi refuzoi të pushonte çështjen për arsye të imunitetit presidencial.
Në vendimin e tij javën e kaluar, gjykatësi sinjalizoi se nuk ka gjasa të japë ndonjë ndëshkim për presidentin e zgjedhur republikan, pas vendimit të paprecedent të fajësisë për 34 akuza penale në lidhje me falsfikimin e të dhënave të biznesit.
Presidenti i zgjedhur Trump ka thënë se “do të ishte fundi i Presidencës siç e njohim”, nëse vendimi lejohet të qëndrojë.
Avokatët e tij argumentuan të hënën se apelimi i tyre në Divizionin e Apelit të gjykatës gjyqësore të shtetit Nju Jork duhet të shkaktojë atë që njihet si një ndalim automatik, ose pauzë të procedurave. Nëse kjo nuk ndodh, thanë ata, vetë gjykatësi Merchan duhet të veprojë dhe ta ndalë dënimin e së premtes.
Ata i kërkuan gjykatësit Merchan që t’i informonte deri të hënën pasdite për vendimin e tij “për t’i lënë kohë të mjaftueshme Presidentit Trump për të kërkuar një shqyrtim urgjent në apel”.
“Sot, ekipi ligjor i Presidentit Trump ndërmori hapa për të ndaluar dënimin e paligjshëm në Gjuetinë e Shtrigave të prokurorisë së Manhattanit”, tha zëdhënësi i Presidentit të zgjedhur Trump, Steven Cheung. “Vendimi historik i Gjykatës së Lartë mbi imunitetin, kushtetuta shtetërore e Nju Jorkut dhe precedenti i vendosur ligjor kërkojnë që kjo sajesë e pavlerë të hidhet poshtë menjëherë”.
Një mesazh ku kërkohej koment u la për zyrën e prokurorit të qarkut të Manhattanit, i cili drejtoi çështjen hetimore.
Vonesa për dhënien e dënimit mund të shtyjë kohën e mbylljes së çështjes deri pas fillimit të mandatit të dytë presidencial të zotit Trump më 20 janar. Si president, ai do të ketë sërish imunitet nga procedimet penale, duke e bërë të pamundur që ai të mund të dënohet gjatë kohës që është në detyrë. Nëse dënimi nuk ndodh përpara se Presidenti i zgjedhur Trump të bëjë betimin, pritja derisa ai të largohet nga detyra në vitin 2029 “mund të bëhet opsioni i vetëm i zbatueshëm”, tha gjykatësi Merchan javën e kaluar.
Ndërsa zoti Trump pohoi se imuniteti presidencial dhe mandati i tij i dytë i afërt kërkonin anulimin e vendimit, gjykatësi Merchan shkruajti në vendimin e tij të 3 janarit se vetëm “përfundimi i kësaj çështjeje” duke e dënuar zotin Trump, do t’i shërbente interesave të drejtësisë.
Gjykatësi shkruajti se dënimi i Presidentit të zgjedhur Trump me atë që njihet si një “shkarkim i pakushtëzuar” – pra mbyllja e çështjes pa burg, gjobë, apo ndonjë kusht – “duket të jetë zgjidhja më e zbatueshme”.
Duke pranuar nevojat e procesit të tranzicionit, gjykatësi Merchan i pati dhënë Presidentit të zgjedhur Trump mundësinë të merrte pjesë personalisht, ose të shfaqej virtualisht me video. Kurdo që të dënohet, zoti Trump do të ketë mundësinë të flasë, ashtu si edhe avokatët dhe prokurorët e tij. Pasi të dënohet, ai mund ta apelojë vendimin, siç është zotuar të veprojë.
Akuzat përfshinin një skemë për të fshehur pagesën për të siguruar heshtjen e aktores pornografike Stormy Daniels, në javët e fundit të fushatës së zotit Trump në vitin 2016, për të shmangur publikimin e pretendimeve se kishte patur marrëdhënie seksuale me të vite më parë. Ai thotë se historia e saj është e rreme dhe se nuk ka bërë asnjë shkelje.
Çështja u përqëndrua në mënyrën se si zoti Trump regjistroi rimbursimin e avokatit të tij personal të atëhershëm Michael Cohen, i cili pati bërë pagesën për zonjën Daniels. Gjetja fajtor krijoi mundësinë e dënimit që varionte që nga një gjobë, një dënim me kusht, apo deri në katër vite burg.
Zoti Cohen, një dëshmitar kyç i prokurorisë, i cili më parë kishte bërë thirrje që zoti Trump të futej në burg, tha se “bazuar në të gjitha rrethanat ndërhyrëse” vendimi i gjykatësit Merchan për ta dënuar zotin Trump pa ndonjë ndëshkim “është i arsyeshëm dhe i përshtatshëm”.
Dënimi i Presidentit të zgjedhur Trump fillimisht u caktua për 11 korrikun e kaluar dhe më pas u shty dy herë me kërkesë të mbrojtjes. Pas zgjedhjes së zotit Trump më 5 nëntor, gjykatësi Merchan e shtyu sërish dënimin në mënyrë që mbrojtja dhe prokuroria të mund të jepnin mendimin e tyre mbi të ardhmen e çështjes./VOA
