Afro 252 mijë të moshuar të moshës mbi 70 vjeç janë të detyruar që kontrollin bazë mjekësor ta kryejnë në privat, pasi shteti nuk e mbulon këtë grupmoshë. Të moshuarit e grupmoshës 71-83 vjeç përbëjnë edhe numrin më të lartë të personave të cilët janë përjashtuar nga kontrolli mjekësor bazë, i cili nëse kryhet në privat kap shifrën e afro 6 mijë lekëve të reja, teksa pensioni mesatar në Shqipëri është 18 mijë lekë.
Sipas mjekëve, kjo kategori përveçse janë shtresa më në nevojë, kanë edhe probleme të shumta shëndetësore.
Laidon Shapo, mjek: Këto janë mosha që kanë më shumë se 1 problematikë dhe kjo më bën të mendoj se do të kishte efektivitet nëse do të shtyhej me disa vite. Një nga problematikat që mund të kapet shumë mirë dhe që është problematikë 1 në 8 veta të 70 plus janë me demencë dhe rreth 50% e tyre nuk kapen në kohë.
Për bluzat e bardha, rritja e moshës për përfituesit e kontrollit mjekësor bazë do të ishte një nga mënyrat efikase për të ndihmuar moshën e tretë, siç veprohet edhe në vendet e Europës. Madje të moshuarit të gjitha kontrollet mjekësore i përfitojnë falas.
Laidon Shapo, mjek: Deri në 2050-ën kjo grupmoshë mbi 65 vjeç e lart do të rritet me 47%, 48% dhe në mungesë të check up-it dhe problematikave shoqëruese, kostot do të trefishohen dhe katërfishohen. Në Angli kjo bëhet mes moshave 40-74 dhe të gjitha këto i merr falas.
Por teksa të dhënat e Censit treguan se popullsia 35-70 vjeç është mbi 1 milion e 140 mijë persona, një tjetër problematikë me kontrollin mjekësor bazë është se atë mund ta përfitojnë vetëm 420 mijë persona në vit./tvklan
