Policia e Tiranës ka shpallur zyrtarisht në kërkim biznesmenin 33-vjeçar Jetmir Pepa, i njohur ndryshe si Mir Pepa. Ai akuzohet se ka qëlluar me amrë zjarri pistoletë në një prej klubeve të njohura të natës në kryeqytet “Cinco Cavalli” në orët e para të mëngjesit të 1 Janarit.
Përmes një komunikate të shkurtër për mediat, blutë e kryeqytetit bëjnë me dije se nga kqyrja e vendit të ngjarjes kanë gjetur dhe sekuestruar një gëzhojë.
“Në përfundimin të veprimeve të para hetimore nga Komisariati i Policisë Nr.2, nën drejtimin e Prokurorisë u bë shpallja në kërkim dhe po punohet për kapjen e shtetasit J.P, 33 vjeç. Ky shtetas dyshohet se ka qëlluar me armë zjarri në një ambient festiv në rrugën “Liman Kaba” më datë 01.01.2025 rreth ores 04:30. Nga këqyrja e vendit të ngjarjes është gjetur dhe sekuestruar një gëzhojë.” – thuhet në njoftim.
Ngjarja ndodhi teksa në skenë po performonte reperi i njohur Arkimed Lushaj, i njohur me emrin e artit si Stresi dhe më pas pritet të dilte Dafina Zeqiri.
Burime për mediat bëjnë me dije se Jetmir Pepa ishte ulur në zonën “VIP”, teksa gjatë natës ka hedhur një cigare të pafikur nga vendi ku ishte ulur.
Cigarja e pafikur ra poshtë në një tavolinë ku ishin një grup me djem, të cilët të revoltuar nga ky gjest i Pepës filluan të përplasen verbalisht me të. Më pas debati agravoi, deri në dhunë fizike.
Referuar të njëjtave burime, grupi i djemve, të cilët deri më tani nuk janë identifikuar nga policia, kanë qëlluar me gota. Në këtë moment, Jetmir Pepa ka nxjerrë armën e zjarrit dhe ka qëlluar në ajër, duke shkaktuar kështu panik te qindra të rinj të cilët ishin mbledhur në këtë club për të festuar ndërrimin e viteve.
Fatmirësisht si pasojë e këtyre të shtënave nuk pati viktima, ndërkohë Pepa pas ngjarjes u largua menjëherë nga ambientet e “Cinco Cavalli-t”.
Emri i Mir Pepës doli në qendër të vëmendjes gjatë verës së kaluar, kur ish-bashkëshortja e tij, Mariela Berisha, sulmoi dhe plagosi në një lokal në Tiranë të dashurën e “kazanovës” Pepa, Klea Prenga.
Ngjarja tronditëse u publikua nga vetë Prenga në rrjetet sociale, ku ajo tregoi plagët dhe dëmtimet e rënda në fytyrë dhe trup. Sipas aludimeve, arsyeja e dhunës ndaj saj lidhej me një marrëdhënie të pretenduar mes Prengës dhe Jetmir Pepajt, çka e bëri incidentin një çështje shumë të përfolur në publik.
Mir Pepa njihet për përfshirjen e tij në ngjarje të ndryshme me precedentë penalë, shpesh të shoqëruara me incidente të armatosura. Ai hiqet si biznesmen në sektorin e ndërtimit në Tiranë, por ka shumë dyshime se pasuria e tij është vendosur nga burime të jashtligjshme.
Në vitin 2020, Pepa u plagos pas një sherri banal në një lokal në zonën e Brrylit. Pepa është i njohur për lidhjet e tij me figura publike dhe më parë ka qenë në një marrëdhënie me motrën e Oriola Marashit, Xhulia Marashi.
Ngjarja e ndodhur në Cinco Cavalli ka rikthyer vëmendjen mbi sigurinë në club-et e Tiranës dhe ka ngritur pikëpyetje për mënyrën se si personat me të kaluar problematike arrijnë të shmangin kontrollet e sigurisë dhe të shkrepin ‘koburen’ pa i’u dridhur qerpiku.
